Русский
English
Жорий йилнинг 21 февраль куни “Эл-юрт умиди” жамғармаси ва Германиянинг академик алмашинув хизмати (DAAD) ўртасида учрашув бўлиб ўтди. Учрашувда Жамғарма ижрочи директори А.Бекмуродов, ижрочи директор ўринбосари в.б. Ж. Ахмедов, бўлим бошлиқлари А. Хамдамов, А. Аъзамхонов ва Германия академик алмашинув хизмати (DAAD) ташкилотининг Шарқий Европа, Марказий Осиё ва Жанубий Кавказ минтақалари раҳбари Др. Ҳеико Шмидт ва Вера Роговалар иштирок этишди.
Маълумот учун: Германиянинг академик алмашинув хизмати (DAAD) халқаро академик алмашинувларни қўллаб-қувватловчи жамоат ташкилоти сифатидаги энг йирик бирлашмалардан биридир. Ташкилотнинг асосий мақсадлари Германияда ва хорижда ёш авлодни фан ва маданият, иқтисод ва сиёсат соҳаларида қўллаб-қувватлаш, уларни Германиянинг нуфузли университетларида таълим олишини ташкил этиш, шунингдек, Германия университетларининг халқаро миқёсда нуфузини ошириш чораларини кўради. Ташкилот таълим соҳасида хорижлик талабаларнинг стипендиялар тақдим этади.
Учрашувда ҳамкорликдаги қўшма стипендия дастури доирасида Ўзбекистонлик ёшлар ва мутахассисларни Германия Олий таълим муассасаларида ўқиши учун қўшимча имкониятлар яратиш, нуфузли университетлар ва компанияларда қисқа муддатли малака ошириш ва стажировка курсларини ташкил этиш каби масалалар муҳокама қилинди.
Мазкур дастур орқали республикамиздаги иқтидорли ва истиқболли ёшларни ва соҳа мутахассисларини, хусусан, давлат хизматчиларини очиқ стипендия танловларини эълон қилиш орқали излаб топиш, танлаш ва рағбатлантириш, уларни Германиянинг нуфузли олий таълим, илмий ва бошқа муассасаларда таълим олишини ташкил этиш кўзда тутилмоқда.
Бунинг натижасида республикамиздаги энг устувор таълим йўналишлари бўйича Германиянинг нуфузли университетларида ва илмий марказларида замонавий билим ва кўникмага эга бўлган мутахассисларни тайёрлаш имконияти яратилади.
Шунингдек, томонлар ҳамкорликнинг истиқболлари, Германиянинг академик алмашинув хизмати (DAAD) билан ҳамкорликдаги қўшма стипендия таълим дастурларини молиялаштириш масалалари муҳокама қилинди.
Жамғарма томонидан вазирликлар, идоралар ҳамда ташкилотларнинг тўғридан-тўғри мақсадли буюртмалари асосида истиқболли ва талаб юқори бўлган мутахассисликлар, жумладан нанотехнологиялар, сунъий интеллект, атом ва қуёш энергетикаси, соғлиқни сақлаш, фармацевтика, телемедицина, вирусология, геология, металлургия, машинасозлик, туризм, кулинария, меҳмонхона иши каби бугунги кундаги устувор ҳисобланган соҳалар бўйича малака ошириш ва стажировка ўтиш дастурларини ташкил этиш бўйича таклифлар киритилди.
“Эл-юрт умиди” жамғармаси ва Германиянинг академик алмашинув хизмати (DAAD) ўртасида ўзаро ҳамкорлик алоқаларни истиқболини белгиловчи олдинги учрашувларда муҳокама қилинган икки томонлама меморандум лойиҳаси кўриб чиқилди, ҳамда қатор қисмларига тузатишлар киритишга келишилди. Томонлар кейинги учрашувда ҳамкорликдаги меморандумни имзолашга келишиб олдилар.