“Эл-юрт умиди” жамғармаси ва Буюк Британиянинг Йорк университети ўртасида ҳамкорлик алоқалари янада кенгаймоқда

2023 йилнинг 16 февраль куни “Эл-юрт умиди” жамғармаси ижрочи директор ўринбосари в.б. Ж.Aхмедов, Жамғарма бўлим бошлиқлари A.Хамдамов ва A.Aъзамхонов ҳамда Йорк университетининг Халқаро қабул бўйича менежери Ник Скивингтон ўртасида икки томонлама ҳамкорлик алоқаларини янада ривожлантириш масалалари муҳокамаси юзасидан ZOOM орқали онлайн мулоқот бўлиб ўтди.

Маълумот учун: Йорк университети 1963 йил ташкил этилган бўлиб, бу давр мобайнида университет 100 дан ортиқ касбий йўналишлар бўйича битирувчиларни тайёрламоқда. Йорк университети (University of York) Буюк Британияда жойлашган йирик олий таълим муассасаси бўлиб, QS (QS World University Rankings) халқаро миқёсда эътироф этилган академик рейтингида 162 ўринда туради. Бирлашган Қиролликда эса етакчи 10 университетининг бири ҳисобланади.

Йорк университетининг тузилиши умумий тизимда бирлаштирилган бир нечта коллежлардан иборат. Университетида кўплаб чет эллик ёшлар ва мутахассислар таълим олади. Университетининг ҳар бешинчи талабаси чет эллик ҳисобланади ва ушбу таълим даргоҳида 20 мингдан ортиқ ёшлар таҳсил олади. Таниқли битирувчилари Португалиянинг 21 президенти (Анибал Кавако Силва), Жанубий Кореянинг 39 Бош вазири (Хан Сеунг-су), НАТО матбуот котиби Марк Латей ва ББСнинг энг машҳур радио бошловчиси Филипп Лестер каби машҳур инсонлар бор.

Мазкур учрашувда, Ж. Ахмедов томонидан “Эл-юрт умиди” жамғармаси ва Йорк университети ўртасида ўзаро ҳамкорлик алоқаларни истиқболини белгиловчи олдинги учрашувларда муҳокама қилинган икки томонлама меморандумни яқин кунларда имзолаш, Жамғарма орқали университетда таълим олишни режалаштираётган ҳар бир стипендиатларнинг ўқиш харажатларидан 25 фоиз чегирмалар ажратиш имкониятлари бўйича таклифлар киритилди.

Шу билан бирга, вазирлик ва идораларнинг мақсадли буюртмаси асосида давлат хизматчиларини Йорк университетида қисқа муддатли малака ошириш ва стажировка ўтишини ташкил бўйича таклифлар муҳокама қилиниб, Жамғарма томонидан республикамиз вазирлик ва идоралари раҳбар кадрлари учун Буюк Британиянинг Йорк университетида малака ошириш курсларини ташкил этиш жорий йилда амалга ошириладиган бўлди.

Ўз ўрнида мазкур таклифлар Ник Скивингтон томонидан қўллаб қувватланиб, мазкур йўналишларда ҳамкорлик алоқаларини ўрнатишга келишиб олинди.

Учрашув якунида томонлар вазирлик ва идора мутахассислари, илмий изланувчилари, тадқиқотчилар ва ёшлар учун “Йорк университетида таълим олиш имкониятлари” мавзусида жорий йил 23 февраль куни Тошкент вақти билан соат 15:00 да онлайн вебинар ўтказишга келишиб олдилар.