Давлат хизматини ривожлантириш агентлиги, «Эл-юрт умиди» жамғармаси ҳамкорликда Самарқанд вилояти ёшлари ва мутахассислари учун амалий-услубий семинарлар ташкил этилди

2022 йил 18 апрель куни соат 10:00 да Самарқанд шаҳридаги ёшлар марказида ташкил этилган анжуманда «Эл-юрт умиди» жамғармаси директори ўринбосари в.б. Ж.Ахмедов томонидан тақдимот ўтказилди.

Мазкур тақдимот давомида Ж.Ахмедов «Эл-юрт умиди» жамғармаси томонидан илғор хорижий давлатлар нуфузли университетлари ва илмий марказларида бакалавриат, магистратура ва докторантурада таълим олиш учун 366 ўринга мўлжалланган 2022 йилги 2-стипендия танлови тартиби билан боғлиқ янгиликларни Самарқанд ёшлари ва мутахассисларига етказди.

Семинарлардан кўзланган мақсад: Жамғарма томонидан иқтидорли ҳамда истиқболли, айниқса республика ҳудудларидан ёш мутахассисларни излаб топиш, танлашга қаратилган фаолиятни тубдан такомиллаштириш ва янада модернизациялаш, уларнинг хориждаги нуфузли таълим ва илмий муассасаларда, ишлаб чиқариш, инновацион ва бошқа компанияларда мақсадли таълим олишини ташкил этиш, профессионал, чуқур билимга эга, замонавий фикрлайдиган ва ватанпарварлик руҳида тарбияланган янги авлод кадрларини шакллантириш ва уларни давлат хизматига жалб этиш мақсадида ҳудудий амалий-услубий семинарлар ўтказилмоқда.

Мазкур семинар вилоятнинг 9 та туманлари вакиллари учун видеомулоқот кўринишда ташкил этилиб 1500 дан ортиқ ёшларга ва мутахассисларга Жамғарма таълим дастурлари, танловларда ажратилган ўринлар, танлов ўтказиш тартиби ва механизми тўғрисида маълумотлар берилди.

Куннинг иккинчи ярмида Ургут туманида мазкур семинарлар давом эттирилиб вилоятнинг 7 та бир-бирига яқин туманлари видеомулоқот мосламаси орқали суҳбатлар давом этди.

Тақдимотлар қизғин савол-жавоблар ва муҳокамаларга бой тарзда ўтказилиб, 200 га яқин ёшлар ўзларини қизиқтирган саволларига тегишли жавобларни мутахассислардан олдилар, шунингдек, ўзларининг хорижда таълим олишга оид таклифлари билан фаол иштирок этдилар. Тадбир ОАВ вакиллари, хусусан вилоят ва туман марказий телевидениеси томонидан кенг ёритилиб, маҳаллий телевидение учун махсус интервьюлар берилди.