Русский
English
Жорий йилнинг 13 январь куни “Эл-юрт умиди” жамғармасининг хорижда таҳсил олаётган стипендиатлари билан видеомулоқот шаклида учрашув ташкил этилди.
Учрашувдан кўзланган мақсад – стипендиатлар билан Янги Ўзбекистоннинг 2022-2026 йилларга мўлжалланган Тараққиёт стратегияси лойиҳасини муҳокама қилиш, уларнинг таклиф ва мулоҳазаларини ўрганиш, стипендиатларда ватанпарварлик туйғусини ошириш, улар билан доимий мулоқот ўрнатиш, муаммоларини ўрганиш ва ҳал қилишга кўмаклашишдан иборат.
Маълумот учун: Бугунги кунда “Эл-юрт умиди” жамғармаси орқали дунёнинг ривожланган давлатларида жами 297 нафар стипендиат, улардан
83 нафари бакалавриат, 91 нафари магистратура ва ординатура, 55 нафари докторантура, 37 нафари ординатурада ҳамда 31 нафари малака ошириш ва стажировка таълим дастурларида таҳсил олмоқда (маълумот илова қилинади).
Учрашувда “Эл-юрт умиди” жамғармаси раҳбарияти, Давлат хизматини ривожлантириш агентлиги масъуллари, Тараққиёт стратегияси раҳбарияти ва Жамғарманинг 150 нафардан ортиқ яқин стипендиатлари иштирок этди.
Видеомулоқотларда:
Янги Ўзбекистоннинг 2022-2026 йилларга мўлжалланган Тараққиёт стратегияси лойиҳаси мазмун-моҳияти;
Лойиҳада айнан ёшларга яратилиши режалаштирилган имкониятлар ва таълим тизимида амалга ошириладиган ислоҳотлар;
Хорижда таълим олаётган стипендиатларнинг таълим олиш ва яшаш шароитларини ўрганиш юзасидан амалга оширилаётган ишлар;
хориждаги нуфузли олий таълим муассасаларида таҳсил олиб, қайтиб келиб, давлат идораларида меҳнат қилаётган мутахассисларга яратилаётган имкониятлар ҳақида батафсил маълумот берилди.
Жумладан, Ўзбекистон Республикаси Тараққиёт стратегияси маркази Ижрочи директори Э.С.Туляков ўз маърузаси билан иштирок этиб, жамғарманинг хорижда таълим олаётган стипендиатларига Янги Ўзбекистоннинг 2022–2026 йилларга мўлжалланган Тараққиёт стратегиясининг мазмун-моҳияти, 2022-2026 йилларда амалга оширилиши режалаштирилаётган ислоҳотлар, Ўзбекистоннинг келгуси
5 йилликдаги режалари юзасидан батафсил маълумотлар берди.
Шунингдек, Жамғарма раҳбарияти томонидан стипендиатларга Тараққиёт стратегияси лойиҳасига ўз мутахассисликларидан келиб чиқиб, хориж тажрибаси асосида асослантирилган таклифларни ишлаб чиқиш, ушбу Тараққиёт стратегияси келгуси беш йилдаги ислоҳотларнинг асоси бўлиши, Жамғарма стипендиатлари хорижда таълим олиб қайтгандан сўнг вазирлик ва идораларда ўз меҳнат фаолиятларини ушбу стратегияга мувофиқ олиб боришлари ҳамда тушунчалар берилди.
Учрашув савол-жавоблар ва муҳокамаларга бой тарзда ўтказилди, стипендиатлар ўзларини қизиқтирган саволларига тегишли жавобларни олдилар, ўзларининг хорижда таълим олишга оид таклифлари ва фикр-мулоҳазалари билан фаол иштирок этдилар.
Ўтказилган учрашувларда Жамғарма стипендиатлари томонидан қуйидаги таклифлар билдирилди:
– электр энергияси бозорини яратишда бозор турларига ва бу бозорда қайта тикланувчи энергия манбалари устуворлигига эътибор қаратиш;
– Ўзбекистон ҳар икки йилда “Уй хўжаликларининг миллий сўровномаси” ни ўтказиш, ушбу сўровномада аҳолига оид демографик маълумотлардан ташқари, аҳолининг олиб борилаётган ислоҳотларга муносабатини, маҳаллий идоралардан қониқишини ва бошқа ижтимоий масалаларга оид маълумотларни йиғиб бориш, йиғилган маълумотларни эса ҳамма учун очиқ порталга жойлаштириш;
– хорижий экспертларни жалб қилган ҳолда амалга оширилаётган лойиҳаларга мутахассислиги бўйича Жамғарма стипендиатларини фаол жалб қилиш;
– қишлоқ хўжалиги маҳсулотларига бўлган талабни қондириш ва нарх-навони барқарор ушлаб туриш мақсадида ҳар бир туман-шаҳарларни ўз имкониятларидан келиб чиқиб, қишлоқ хўжалиги маҳсулотлари турларига ихтисослаштириш;
– стипендиатлар томонидан олиб борилаётган илмий ишлар учун Ўзбекистонда фаолият олиб бораётган вазирлик, идора ва ташкилотлардан маълумотлар олишга имконият яратиш;
– стипендиатларнинг илмий ишларини Ўзбекистонда нашр этилаётган нуфузли илмий журналларда чоп этишга кўмаклашиш;
– Ўзбекистонни хориждаги имиджини ошириш учун мамлакатимизда амалга оширилаётган ислоҳотлар, жумладан Тараққиёт стратегиясини тарғиб қилувчи буклетлар, флаерлар, видео роликлар ва таҳлилий тарқатма материалларни стипендиатларга етказиб туриш.
Учрашувлар якунида қуйидагиларга келишиб олинди:
– стипендиатлар кўмагида улар таҳсил олаётган муассасалар ва ташкилотларда Ўзбекистонни танитиш ва хориждаги имиджини ошириш учун Ўзбек маданияти ва қадриятлари кунларини ўтказиш;
– стипендиатлар томонидан Республикамиз олий таълим муассасалари ва хорижий университетлар ўртасида доимий ҳамкорлик алоқаларини йўлга қўйишга яқиндан кўмаклашиш;
Видеомулоқот якунида Жамғарма стипендиатлари ўзларига билдирилган юксак ишончни оқлаб, хориждаги илғор билим ва тажрибани ўзлаштирган ҳолда юртимизга қайтиб, Республикамизни ривожланган давлатлар қаторига қўшилиши учун бор куч ва имкониятларини сафарбар этишларини таъкидлаб ўтдилар.
Маълумот учун киритилмоқда.
Жамғарма Ахборот хизмати