Русский
English
2020 йил 1 июль. 16.00-18.00, Тошкент вақти.
Ўзбекистон Республикаси Президентининг 2020 йил 2 мартдаги ПФ-5953-сонли Фармони билан тасдиқланган “Илм, маърифат ва рақамли иқтисодиётни ривожлантириш йили” давлат дастурининг ижросига мувофиқ “Эл-юрт умиди” жамғармаси хорижда профессионал фаолият олиб бораётган олимлар ва экспертлар, жумладан, ватандошларимиз билан мулоқот олиб бормоқда.
“Эл-юрт умиди” жамғармаси шундай мулоқотлар натижасида Hult International Business School ва London School of Economics (Буюк Британия)да педагогик фаолият олиб бораётган ватандошимиз Ҳамиджон Иргашев орқали профессор Алессандро Лантери (Alessandro Lanteri) билан мулоқот ўрнатди.
Профессор Алессандро Лантери АҚШ ва Буюк Британиянинг энг нуфузли университетларида таълим олган ва бугунги кунда Hult International Business School ва Oxford Universityда профессионал педагогик фаолият олиб бормоқда. Алеcсандро Лантери бугунги кунда Индустриал революция 4.0 ва Иқтисодиётни рақамли трансформациялаш йўналишларида илмий-амалий тадқиқотлар олиб бормоқда.
Алеcсандро Лантери турли йилларда ва йўналишларда Бирлашган миллатлар ташкилоти, Бутунжаҳон Иқтисодий Форуми, айрим ҳукуматлар ва халқаро компанияларга турли йўналишларда маслаҳатлар бериб келган.
“Эл-юрт умиди” жамғармасининг мурожаатига асосан, Ўзбекистонда давлат хизматчилари, таълим ва илмий соҳа кадрлари салоҳиятини оширишга кўмаклашиш мақсадида, Алеcсандро Лантери 2020 йил 1 июлда соат 16.00-18.00 га қадар “Турбулент шароитда стратегик лидерлик” мавзусида вебинар ўтиб беришини маълум қилди.
Вебинар олий таълим ва илмий тадқиқотлар соҳасида, шунингдек Ўзбекистонни халқаро майдонга интеграциясини таъминлашга масъул бўлган вазирлик ва идораларда фаолият олиб бораётган мутахассислар учун фойдали бўлади, деб ўйлаймиз.
“Эл-юрт умиди” жамғармаси Hult International Business School ва Бухоро давлат университети билан ҳамкорликда томонидан Буюк Британиялик профессор Алеcсандро Лантери иштирокида ташкил этилаётган вебинарда вазирликлар, идоралар ва турли ташкилотлар, хусусан олий ўқув юртларининг қизиқувчи ва манфаатдор ходимларини иштирок этишга таклиф қилади. Вебинар инглиз тилида бўлади, ўзбек тилига синхрон таржимаси ташкил қилинади.
Вебинарда иштирок этиш учун www.webinars.eyuf.uz орқали рўйхатдан ўтилади, 2020 йил 25 июнга қадар электрон почта орқали вебинарга боғланиш манзили юборилади.
Профессор Алеcсандро Лантерининг қисқача биографияси.
Жамғарма Матбуот хизмати