Хорижий давлатларда бакалавриат, магистратура ва докторантура дастурлари асосида таълим олиш учун 272 ўринга мўлжалланган навбатдаги 3-стипендия танлови саралаш босқичи жараёнлари юзасидан Танлов комиссиясининг навбатдаги иккинчи йиғилиши бўлиб ўтди

Жорий йилнинг 16 август куни “Эл-юрт умиди” жамғармасининг

3-стипендия танлови саралаш босқичи жараёнлари юзасидан Танлов комиссиясининг навбатдаги йиғилиши бўлиб ўтди.

Мазкур йиғилишда 20 дан ортиқ Танлов комиссиясини аъзолари масъул вазирлик ва идораларнинг раҳбар ходимлари иштирок этиб, танловнинг саралаш босқичи жараёнлари атрофлича муҳокама қилинди.

 Жамғарма стипендия танловларининг биринчи яъни электрон ҳужжат топшириш босқичида жорий йил 16 август соат 12.00 ҳолатига жами 2265 нафар номзодлар электрон шаклда рўйхатдан ўтган, жумладан, докторантура дастури бўйича 287 нафар, магистратура дастури бўйича 1431 нафар, бакалавриат дастури бўйича 547 нафар номзодлар маълум даражада ҳужжатларини тизимга юклаган.

Йиғилиш иштирокчилари томонидан онлайн платформадан рўйхатдан ўтган, бироқ ҳужжатларида айрим камчиликлар бўлган номзодлар билан ҳар бир вазирлик, идора ва ташкилотлар кесимида алоҳида ишлаш, уларга тегишли тушунчалар бериш ва амалий ёрдам кўрсатиш юзасидан Танлов комиссияси раиси томонидан кўрсатмалар берилди.

Бундан ташқари, мазкур йиғилишда вазирлик ва идоралар, айниқса таълим муассасалари тизимидаги ёш, иқтидорли ва истиқболли ёшларни Жамғарма стипендия танловларига жалб қилиш бўйича муҳокамалар бўлиб ўтди.

Жамғарма стипендия танловлари ва Танлов комиссиясининг келгусидаги фаолияти юзасидан қўшимча ахборот бериб борилади.

Танлов комиссиясининг техник гуруҳи