Русский
English
“Эл-юрт умиди” жамғармаси томонидан ўтказилган 2021 йил 350 ўринга мўлжалланган стипендия танлови натижалари ҳамда Хорижий давлатларда бакалавриат, магистратура ва докторантура дастурлари асосида таълим олиш учун навбатдаги 3-стипендия танловини кенг оммага етказиш юзасидан МАТБУОТ АНЖУМАНИ
ПРЕСС-РЕЛИЗИ
Мамлакатимизда сўнгги беш йилда амалга оширилаётган ислоҳотлар ўзининг кўлами, шиддати ва кенг қамрови билан нафақат юртдошларимиз, балки хорижлик сиёсатчи ва мутахассисларнинг ҳам эътиборини тортмоқда. Бугун Президент Шавкат Мирзиёев раҳбарлигида мамлакатимиздаги янгиланиш ва ислоҳотлар ҳақида сўз кетганда жаҳон ҳамжамияти “Янги Ўзбекистон” деган иборани тилга олмоқда. Бундай эътироф ҳеч муболағасиз юртимиздаги шиддатли ўзгаришларга берилган муносиб баҳодир.
Президентимизнинг 2020 йил 29 декабрда Ўзбекистон Республикаси Олий Мажлиси ва халқига қилган Мурожаатномасида ҳар йили илм-фаннинг бир нечта йўналишига устувор аҳамият қаратилиб, уларни жадал ривожлантирилишини таъкидлаган эди. Жумладан, “Эл-юрт умиди” жамғармаси томонидан илк маротаба бакалавриатга 100 ўрин, магистратура ва докторантурага эса олдинги йилларга нисбатан 5 баробар кўп ўрин ажратиш ташаббуси эълон қилинди.
Иқтидорли ва истиқболли, айниқса республика ҳудудларидан ёш мутахассисларни излаб топиш ва танлашга қаратилган фаолиятни тубдан такомиллаштириш ва янада модернизациялаш, уларнинг хориждаги нуфузли таълим ва илмий муассасаларда, ишлаб чиқариш, инновацион ва бошқа компанияларда мақсадли таълим олишини ҳамда стажировкадан ўтишини ташкил этиш, профессионал, чуқур билимга эга, замонавий фикрлайдиган ва ватанпарварлик руҳида тарбияланган янги авлод кадрларини шакллантириш ва уларни давлат хизматига жалб этиш долзарб аҳамият касб этмоқда.
Юқоридагилардан келиб чиқиб, Ўзбекистон Республикаси Президентининг “Давлат хизматчилари ва мутахассисларни хорижда тайёрлаш ҳамда уларнинг салоҳиятини янада ошириш тизимини тубдан такомиллаштириш чора-тадбирлари тўғрисида”ги ПФ-6168-сон Фармони қабул қилинди.
Мазкур Фармонга асосан:
очиқ стипендия танловлари асосида хорижда бакалавриат, магистратура ва докторантурада таълим олиш дастурлари Жамғарманинг асосий таълим дастурлари ҳисобланиши;
Жамғарма таълим дастурлари бўйича номзодларни саралаш танлови мунтазам равишда ва Ўзбекистон Республикасининг барча фуқаролари учун, уларнинг республикадаги иш ва ўқиш жойидан қатъий назар очиқ тарзда амалга оширилиши белгилаб қўйилган.
Ўзбекистон Республикаси Президентининг Мурожаатномасида ҳамда юқоридаги Фармонда “Эл-юрт умиди” жамғармасига берилган топшириқлар ижросини таъминлаш мақсадида Жамғарманинг барча таълим йўналишлари ва мутахассисликлар бўйича 350 ўринга мўлжалланган навбатдаги стипендия танловлари жорий йил апрел-июнь ойларида ўтказилди.
Танловга қўйилган 350 ўринга 3810 нафар номзод ариза берган бўлиб, Жамғарма талабига тўлиқ жавоб берган (хорижий тилни CEFR B2 даражада ўзлаштирган ва хорижий таълим муассасасига ўқишга қабул қилинган) жами 196 нафар номзод танловларда иштирок этди.
Танлов натижаларига асосан “Эл-юрт умиди” жамғармаси Васийлик кенгаши қарорига кўра жорий йил 1 июлда 78 нафар номзодлар Жамғарма стипендиатлари деб эътироф этилди.
Жами 78 нафар стипендиатларнинг 37 нафари АҚШ, 21 нафари Буюк Британия, 4 нафардан Германия ва Италияга, 3 нафар Канада, 2 нафардан Бельгия ва Россияга, 1 нафардан Австралия, Австрия, Испания, Франция ва Малайзия давлатларига тўғри келади. Стипендиатларнинг 31 нафари бакалавриат, 38 нафари магистратура ва 9 нафари докторантура таълим дастурларига тўғри келмоқда.
Шу муносабат билан 2021 йилнинг 27 июль куни соат 16:00 да Ахборот ва оммавий коммуникациялар агентлигида мазкур стипендия танловининг натижалари, ғолибликни қўлга киритган стипендиатларни хорижий давлатларга юбориш юзасидан Жамғарма томонидан амалга оширилаётган ишлар ҳамда навбатдаги 3-стипендия танловини кенг оммага эълон қилиш мақсадида матбуот анжумани ташкил этилмоқда.
МАТБУОТ АНЖУМАНИНГ ДАСТУРИ:
1. Кириш сўзи. Жамғарманинг барча таълим йўналишлари ва мутахассисликлар бўйича 2021 йилдаги 350 ўринга мўлжалланган навбатдаги стипендия танлови натижалари ва уларни хорижга таълим олишга юбориш борасида амалга оширилаётган ишлар тўғрисида.
(Жамғарма ижрочи директорининг биринчи ўринбосари в.б О. Саттаров). (5 минут)
2. Хорижий давлатларда бакалавриат, магистратура ва докторантура дастурлари асосида таълим олиш учун навбатдаги 3-стипендия танловига тайёргарлик кўриш ва уни эълон қилиш борасида борасида Жамғарма томонидан амалга оширилаётган ишлар тўғрисида:
(Жамғарма ижрочи директор ўринбосари в.б. Ж. Ахмедов) (5 минут)
3. “Эл-юрт умиди” жамғармаси томонидан ўтказиладиган навбатдаги танловларни кенг оммага етказиш ва эълон қилиш мақсадида расмий веб-сайти ҳамда ижтимоий тармоқларидаги каналларида, шу билан бирга оммавий ахборот воситаларида Жамғарманинг танловлари борасидаги янгиликларини ёритиб бориш тўғрисида.
(Жамғарма Ахборот хизмати раҳбари М. Содиқов) (5 минут)
4. Савол-жавоблар, муҳокама ва таклифлар, якуний хулоса.
Мурожаат учун телефонлар: Тел.: (998 71) 203-14-41 – (998 71) 203-00-47.
Манзил: Тошкент шаҳри, Амир Темур кўчаси 13, “Эл-юрт умиди” жамғармаси
www.eyuf.uz
facebook.com/eyuf.uz
instagram.com/elyurtumidifoundation
twitter.com/elyurtumidi
t.me/elyurtumidifoundation