Таълим муассасалари раҳбарлари, профессор-ўқитувчи ва педагоглар, ёш олимлар, илмий изланувчилар ҳамда амалиётчи мутахассислар диққатига!

Хабарингиз бор, 2021 йилдан бошлаб “Эл-юрт умиди” жамғармаси томонидан энг нуфузли хорижий давлатларда магистратура ва докторантура босқичида таҳсил олиш учун стипендия дастурлари миқдорини 5 баробарга ошириш кўзда тутилган.

Шу боис, жорий йил 20 январда Жамғарма томонидан математика, кимё, биология ва геология йўналишлари бўйича биринчи стипендия дастурлари учун ҳужжатлар қабул қилиш бошлангани эълон қилинган эди.

2021 йил 7 февраль ҳолатига кўра ушбу танлов учун ажратилган 250 ўрин учун жами 422 та электрон ҳужжат келиб тушган. Бунда талабгорларнинг 131 нафари магистратура, 46 нафари докторантура, 119 нафари стажировка ва малака ошириш дастури бўйича 126 та номзодлар рўйхатдан ўтган ҳамда ҳужжатларини қисман юклаган.

Мамлакатимизда интеллектуал салоҳиятга эга, замонавий ва креатив фикрлайдиган, мамлакат илм-фанига инновацион ғоялар ва технологиялар олиб кириш ҳамда уни рақамли асосда ривожлантиришни ўз олдига мақсад қилиб қўйган ёшлар минглаб топилади.

Бироқ бу каби танловларга ёшларни қизиқтириш, устоз шогирд анъанасини қўллаган ҳолда, уларни юртимиз ижтимоий-иқтисодий ҳаёти, илм-фан соҳаси учун долзарб бўлган мавзуларни, нуфузли хорижий илмий марказларни танлашда амалий ёрдам кўрсатиш жуда муҳим.

Шундай экан, вазирлик ва идоралар, олий таълим муассасалари, илмий марказлар раҳбарлари ҳамда профессор-ўқитувчилардан бу борада фаоллик кўрсатиб, ёшларни қўллаб-қувватлашлари ва йўл-йўриқлар беришларини сўраймиз.

Барча номзодлар ҳужжат топширишдан олдин Ўзбекистон Республикаси Президентининг 2018 йил 25 сентябрдаги ПФ-5545-сон Фармони билан тасдиқланган Хорижда таълим олиш учун номзодларни танлов асосида танлаб олишни ўтказиш тартиби тўғрисидаги НИЗОМ билан батафсил танишиб чиқишлари ва низомда белгиланган ҳужжатларни тўлиқ юборишлари тавсия этилади.

Эслатиб ўтамиз, номзодларнинг ҳужжатлари 2021 йил 20 февралига қадар, республиканинг барча ҳудудлари вакиллари учун ягона тартиб ва тенг имконият асосида, онлайн режимда ва электрон тарзда қабул қилинади.

Онлайн ҳужжат топшириш: https://admission.eyuf.uz