Ўзбекистон Республикаси Президенти Шавкат Мирзиёевнинг ташаббуси билан “Саховат ва кўмак” жамғармаси ташкил этилди

Ўзбекистон Республикаси Президенти Шавкат Мирзиёевнинг ташаббуси билан “Саховат ва кўмак” жамғармаси ташкил этилди.

Ўзбекистон ҳукуматининг 22 апрелдаги қарори билан «Саховат ва кўмак» жамғармаси ҳамда унинг Қорақалпоғистон Республикаси, вилоятлар ва Тошкент шаҳар ҳамда туман (шаҳар) бўлинмалари ташкил этилди. Бу ҳақда Адлия вазирлиги матбуот хизмати хабар қилди. Президент Шавкат Мирзиёев 20 апрель куни шундай номдаги ҳаракатни бошлаш таклифини илгари сурган эди.

Мазкур фармойиш билан «Саховат ва кўмак» жамғармаси тўғрисидаги низом тасдиқланди.

Жамғарма ва унинг бўлинмалари «Маҳалла» хайрия жамоат фонди ҳамда унинг ҳудудий бўлинмалари ҳузурида очилиб, улар юридик шахс ҳисобланмайди.

Жамғарма маблағлари ҳомийлик ва хайрия маблағлари, қонун ҳужжатларида тақиқланмаган бошқа манбалар ҳисобидан шакллантирилади.

Жамғарма маблағлари коронавирус пандемияси ва карантин даврида ижтимоий ҳимояга муҳтож, кўп фарзандли оилаларга, ногиронлиги бўлган шахсларга ва ёлғиз қарияларга, ўз даромадини йўқотган вақтинча ишсиз бўлган жисмоний шахсларга пул маблағлари, кундалик истеъмол товарлари, дори воситалари ва бошқа маҳсулотлар билан таъминлаш учун ишлатилади.

Жамғарма ва унинг бўлинмаларига маблағларнинг келиб тушиши ва улардан фойдаланилиши бўйича оммавий ахборот воситаларида эълон қилиб борилади.