“Эл-юрт умиди” жамғармаси Республика Олий таълим кенгашибилан ҳамкорликда “Олий таълим тизимида онлайн курслар ва масофавий таълим” мавзусидаги навбатдаги видеоконференция режалаштирилмоқда

“Эл-юрт умиди” жамғармаси Республика Олий таълим кенгашибилан ҳамкорликда “Олий таълим тизимида онлайн курслар ва масофавий таълим” мавзусидаги навбатдаги видеоконференция режалаштирилмоқда

“Эл-юрт умиди” жамғармаси ҳузуридаги Халқаро экспертлар кенгаши томонидан жорий йил март ойидан бугунги кунга қадар 10 дан ортиқ турли мавзуларда видеомулоқотлар ташкил этиб келинмоқда.

Мазкур видеомулоқотларда олий таълимни ривожлантиришга оид тақдимотлар қилиниб, хорижий экспертлар бўлган ватандошларимиз томонидан таклиф ва тавсиялар ишлаб чиқилди ва мутассади вазирлик ва идораларга тақдим этилмоқда.

“Эл-юрт умиди” жамғармаси Республика Олий таълим кенгаши билан ҳамкорликда 2020 йил 28 август куни Тошкент вақти билан соат 16:00 да “Олий таълим тизимида онлайн курслар ва масофавий таълим” мавзусидаги навбатдаги видеоконференция режалаштирилмоқда.

Видеоконференция тақдимоти икки қисмдан иборат бўлиб, уларда “Оммавий очиқ онлайн курслар: Coursera ва бошқа онлайн платформалар” ҳамда “Масофавий таълимни жорий этишнинг долзарб масалалари: Буюк Британия университетлари мисолида” каби мавзулари юзасидан тақдимотлар бўлиб ўтади.

Мазкур видеоконференцияда Жамғарма Халқаро экспертлар кенгаши аъзолари, хорижда истиқомат қилаётган ватандош экспертлардан Россия Федерациясининг Корпоратив университети Муҳандислик экспертиза-сини ривожлантириш маркази эксперти Одилбек Каттаев ҳамда Буюк Британиянинг Hult International Business School профессор-ассистенти Ҳамид Иргашевлар ўз тақдимотлари билан иштирок этиши кутилаяпти.

Тақдимотларда олий таълим тизимида онлайн ва масофавий таълимни ташкил этиш, оммавий очиқ онлайн курсларнинг аҳамияти, онлайн платформалар ва масофавий таълимни жорий этишнинг хорижий давлатлар тажрибаси каби масалаларга алоҳида эътибор қаратилиши кутилмоқда.

Фикримизча, ташкил этилаётган онлайн амалий-услубий семинар янги ўқув йилини онлайн тарзда бошлаётган республикамиз олий таълим ташкилотлари профессор-ўқитувчилари учун анча самарали тадбир бўлади.

Видеоконференцияда қатнашиш учун www.webinar.eyuf.uz линк орқали рўйҳатдан ўтиш керак бўлади. Видеоконференцияда қатнашувчилар Zoom платформаси орқали zoom.us/j/2026300504 линки орқали боғланишлари ва иштирок этишлари мумкин бўлади.

Жамғарма Матбуот хизмати